New York

Lentum í Keflavík í morgun eftir vikudvöl í New York, allur hópurinn. Þetta var mikil upplifun. Undarlegt að koma til þessarar borgar i fyrsta sinn sem hefur leikið svo stórt hlutverk í huga manns. Hún er endalaust stór í sniðum og stórbrotin. Bygging Sameinuðu þjóðanna var yfirþyrmandi - þar er hægt að ganga endalaust um gangana og heyra og sjá fólk frá öllum heimshornum. Ég er ein af þeim sem ólst upp við að bera mikla virðingu fyrir og hafa miklar væntingar til SÞ - og ég hef enn þessa trú. Hugmyndin er svo stórfengleg. Húsið sjálft er barn síns tíma og er orðið snjáð og þreytt en samt dásamlegt.

 

Svo var svo gaman hvað tókst vel til með framlag okkar - salurinn lá í hlátri. Kannski einkennilegt þegar haft er í huga alvarleika verkefna okkar. En þessi þversögn er þó sönn.

 

Svo var það Metropolitan safnið - Central Park - Spamalot söngleikurinn - þakgarðurinn á hótelinu okkar, á 14 hæð, (myndir seinna) en samt vorum við eins og við rætur risabygginga á allar hliðar. Heimsókn til Ground Zero var áhrifamikil, sérstaklega að koma í litlu kirkjuna sem varð miðstöð björgunarliða og sjálfboðaliða. Síðast en ekki síst - the New Yorkers, fólkið sjálft sem var elskulegt og blátt áfram. Nema stöku óþolinmóður leigubílstjóri sem fannst við ekki vera nógu skýrar og fljótar að hugsa stundum.     

Athugasemdir

[Garún, 4.3.2008 kl. 00:04]

Velkomnar heim allar saman!

[dia (IP-tala skráð) 4.3.2008 kl. 15:42]

hæ velkomin heim...

hvernær sæki ég pakkann minn ..... þennan frá búðinni í NY ?

bestu kveðjur

[Halldóra Halldórsdóttir, 4.3.2008 kl. 19:35]

Búðirnar já - Apple búðin var ægifögur, sú flottasta. Sumar búðirnar voru svo stórar að mér féllust hendur og ráfaði stefnulaust um eins og vingull. Dótabúðirnar voru margar glæsilegar. Það var svo kalt í veðri að það var mjög oft gott ráð að skella sér inn í verslanir á milli þess að skella sér inn á kaffihús.

[Garún, 4.3.2008 kl. 19:39]

Hvað er vingull???

[Halldóra Halldórsdóttir, 4.3.2008 kl. 19:56]

Það er ég - að rangla stefnulaust um í stórum verslunum í New York.

[Guðbjörg Jónsdóttir, 9.3.2008 kl. 14:59]

Velkomnar heim, Sigamótakonur! Getum við fengið að heyra hvað var svona fyndið í ræðunni ykkar svo við getum hlegið líka, hí, hí. Annars er ég hjá Gyðunni minni í Odense og kem heim 30.mars.

Ég sé þig í anda rangla um eins og vingull í stórverslunum NY-borgar, Dóra mín. Hefði viljað vera fluga á vegg.

[Halldóra Halldórsdóttir, 9.3.2008 kl. 15:38]

Sæl Guðbjörg mín - mín bara alltaf að ferðast. Það sem var mest fyndið var kynning Matthildar á uppátækinu Óbeisluð fegurð fyrir vestan í fyrra. Hún sýndi 10 mínútna kafla úr myndinni. Óborganlega skemmtilegt. En erindi Guðrúnar okkar um kraftinn og gleiðina í starfinu okkar fékk líka góðar viðtökur - og karlanærbuxurnar okkar með orðunum "I´m responsible" framan á vakti mikla lukku líka.