Hver fór til Davos í ár

Ætli einhver hafi farið frá Íslandi á World Economic Forum í Davos í Sviss þetta árið. Kannski Seðlabankastjórar eða fjármálaráðherra. Sennilega ekki útrástarvíkingar - ekki í ár - en þeir voru þarna í fyrra heyrðist mér. Nú er allt annar tónn í ræðumönnum - þar sem kreppan er í algleymingi um allan heim. Nú er sennilega besti mögulegi tími til að gera grundvallarbreytingar á stofnunum okkar sem voru orðnar steinrunnar. Megi það takast sem allra - allra best. 

Sé það rétt..

Sé það rétt að það er ekki hægt að reka seðlabankastjóra þá er það hinn endanlegi dómur yfir þessari stjórn Sjálfstæðismanna. Ef svona er um hnútana búið þá er það með ólíkindum að hafa látið DO fá þessa stöðu til að byrja með. Staðan átti sennilega að vera ein að þessum vel þekktu dúsum sem fyrrverandi embættiskallar fengu af því að þeim leiddist heima. En það hefði öllum sem til þekktu átt að vera ljóst að DO myndi aldrei sitja á friðarstóli þar. Hinir tveir - sem hafa að mestu fallið í skuggann - eru ef til vill með viðeigandi menntun til að stýra seðlabanka, en það hefur ekki farið mikið fyrir því.  

Það sem við viljum - ekki satt

Nú er forsetinn að bregðast við kröfum þjóðarinnar um gagnsæi og trúverðuleika - þá verða háværar raddir um að svona sé aldrei gert! Svona hefur aldrei verið gert! Þetta hefur alltaf verið sagt bak við luktar dyr. 

En nú eru nýjir tímar og svona á einmitt að gera þetta. 

Ólafur Ragnar: Vildi upplýsa þjóðina

Fjaðrafok og smjörklípur

Því ætlar ekki að linna fjaðrafokinu sem seðlabankastjóri númer eitt getur valdið í þessu samfélagi. Nú þarf forsetinn að standa í fæturnar heldur betur. DO sagði sjálfur frá smjörklípuaðferðinni sem amma hans kenndi honum forðum til að dreifa athygli hundsins frá því sem virkilega skiptir máli. Ætli hann sjái ekki eftir því að afhjúpa taktíkina. Eða, hvað er það sem er raunverulega í gangi núna? Ég kem alla vega ekki auga á það enda illa læs í stjórnmálakænsku.

Æxlið sem varð til um síðustu aldamót

Eftir Silfur Egils í morgun leitaði á mig sú samlíking að banka og fjármálakerfið hegðaði sér eins og æxli í þjóðarlíkamanum sem byrjaði að vaxa með ógnarhraða upp úr aldamótum vegna þess að mótstaðan var engin í þeim stofnunum sem áttu að setja því skorður. Það virtust fáir verða varir við hættuna sem blasti við og þeir sem komu auga á hana og vöruðu við hættunni voru kerfisbundið kveðnir niður því að afneitunin var í algleymingi.

Einn þeirra sem var í þættinum í morgun lýsti vel þeim viðhorfum sem giltu í þessum heimi bankamanna og fjárglæframanna sem fengu bankana upp í hendurnar. Fullkomið siðleysi. Líkjast helst frumum í líkamanum sem skyndilega, við góð skilyrði, æða af stað í brjáluðum vexti og skeyta ekkert um heilbrigði heildarinnar.  

En hver er þá lækningin. Nema æxlið burt og beina síðan sterkum ljósgeislum að kjarnanum til að hreinsa burt síðustu skemmdirnar. Ef við verðum reynslunni ríkari og breytum lifnaðarháttum okkar þá má vera að við læknum meinið. Gildin þurfa að breytast og þarf að huga að heill allra þátta í samfélaginu, ná jafnvægi aftur.      

Varpar ljósi á hvatirnar

Þessi grein varpar ljósi á hvaða sterku hvatir liggja að baki þess að taka stórar áhættur í peningamálum. Þessi maður var handtekinn eftir að koma risa banka á kúpuna. Hann var þá búinn að nota bankann eins og spilavíti - með þegjandi samþykki bankans virðist vera.

M. Kerviel, 32, was quoted as saying that he had taken "orgasmic pleasure" in making "astronomic" bets on financial markets.

http://www.independent.co.uk/news/world/europe/jr244me-kerviel-secrets-of-the-rogue-trader-1513434.html 

Skyldi engan undra

Það skyldi enginn vera hissa á því að sitjandi forsætisráðherra trúi því staðfastlega að hann einn, með Sjálfstæðisflokkinn á bak við sig, geti bjargað málum. Sjálfsmynd flokksins byggist á því að vera sá sem stýrir Íslandi. Þá sjaldan að hann er ekki við landsstjórnina er það bara stuttur hvíldartími þar til hann tekur í stjórnartaumana aftur. Svona hefur þetta verið svo langt sem ég man og þessi mynd sem flokkurinn hefur af sér er staðföst og óhagganleg.

Þar fyrir utan er það óbærilegt fyrir sitjandi ráðherra að missa allt út úr höndunum og sitja eftir í sögubókunum sem sá sem var við völd  þegar stoðunum var kippt undan þjóðfélaginu. Og þurfa síðan að hrökklast frá völdum.  

Ginnungagap

Það kemur fram í dag þvílík gjá er á milli stjórnar og borgaranna. Í dag heyrðist mér forsætisráðherra vera að hóta okkur að ef við högum okkur ekki - og gefum þinginu ekki vinnufrið - þá verði hann að nota peningana sem við höfum fengið að láni til að borga fyrir skemmdirnar sem við völdum. Þarna talar hann við mótmælendur eins og óþekka krakka. Gerir hann sér enga grein fyrir því sem er að gerast?
Fréttir af misgjörðum, afglöpum, fjármálabraski og almennri vanhæfni er olía á eldinn. Stjórnin hagar sér eins og hópur álfa út úr hól - skilja ekkert hvernig stendur á þessu. Gjáin breikkar bara.

Örlög sjálfstæðismanna

Eftir að hlusta á gestina í Silfri Egils í dag rann upp fyrir mér hvað stjórnvöld eru búin að gera. Það má rökstyðja það að sjálfstæði einstaklings byggi á því að vera fjárhagslega sjálfstæður, ekki satt. Sem dæmi má skoða sjálfstæðisbaráttu kvenna. Víða í heiminum eru konur enn algerlega fjárhagslega háðar körlunum, feðrum, bræðrum og síðan eiginmönnum. Það er litið svo á að konur séu eins og börn - að þær nái aldrei þeim þroska að geta stýrt fjármálum sínum - auk þess er það áhrifamesta stjórntæki sem til er til að hafa yfirráð yfir fólki. Hér er þetta að mestu liðin tíð og konur afla og stjórna eigin fé.

Sjálfstæðisflokkurinn hefur ávallt litið á sig sem sérstakann málsvara sjálfstæðis landsins. En nú hefur hann (allt að því einn og sjálfur) gert landið gjaldþrota. Ísland er ekki lengur fjárhagslega sjálfstætt ríki, það verður að jarða sjálfstæðan gjaldmiðil sinn fyrr eða síðar. Það verður að taka upp einhvern annan gjaldmiðil hvað sem tautar og raular. Það er auðvelt að sjá fyrir sér hversu skelfilegt það hefur verið fyrir forsætis - og fjármálaráðherra og stjórann í Seðlabankanum þegar skýrslan góða var birt þeim síðastliðið vor þess efnis að bankarnir væru að hrynja. Það má sjá að þeir, og ríkisstjórnin öll, brugðust við eins og fólk gerir þegar það stendur frammi fyrir skelfilegum hlutum. Það frýs og lamast og afneitunin hellist yfir. Síðan var vaðið í örvæntingafulla herferð út um heim til að redda sér.  

Niðurstaðan er sem sagt sú að sá hópur íslendinga sem hafa mest hreykt sér af því að standa vörð um sjálftæði okkar hefur nú komið okkur í þá stöðu að vera búinn að eyðileggja fjárhagslegt sjálfstæði okkar. Sennilega verða íslensk stjórnvöld álitin vera eins og börn á alþjóðlega vísu um langa framtíð.  

Þvílík örlög.  

Já - einmitt

Samkvæmt þessum úrdrætti er þetta ástand enn heimsmálunum að kenna. Hvað með allar þessar örvæntingafullu ferðir ráðamanna til útlanda til að reyna að telja erlendum aðilum trú um að bankarnir mundu hafa þetta af? Hvað með viðvaranirnar allar sem höfðu heyrst frá erlendu fagfólki árin á undan hruninu? Hvaða ríkiskerfi var það sem átti að grípa inní á réttum tíma, var það ekki ríkið sem Geir stýrði og stýrir enn?  Ekki má gleyma að Geir var líka fjármálaráðherra lengi og átti að þekkja málin út og inn.

Geir: Árið verður mjög erfitt